Meri Aatma Ka Mool

Meri aatma ka mool bolo kitna lagaoge,

Ab wo baazaaroo si jaan padti hai,

Dekha tha us roz boli lagte huye,

Toh socha tumhi se pooch lun ki kitna bhaav lagaoge,

Icha jaagi pata toh Karun, aatmaaein aakhir bikti hain toh kitne me,

Meri aatma ka mool kya hai?

Kya tum mujhe batlaoge?

Kya tum sach much iski boli lagaoge?

Bhaav bata hi rahe ho toh mere zameer ka bhi bata dena,

Mere rakht ka, mere ashroon ka bhi batla dena,

Me bhi toh jaanu ki zarurat me jab kuch bechna ho,

Toh kaunsa purza bechun,

Boli lagana tum tab, mujhe zarurat hogi,

Bik jaane ki jab meri koshish hogi,

Ho sake toh yeh bhi samjhaana, yeh purze kahaan jaate hain,

Kahaan aur kiske yahaan istemaal kiye jaate hain,

Jaanna zaruri toh nahi,

Man bas tassali karna chahta hai,

Aur jab sab bik chuka ho toh is man ka bhi bhaav batla dena,

Kuch iske badle bhi milega naa?

Tum mere purzon ka sahi mol laga lena,

Hisaab ka thoda kacha hun naa,

Tum hi sahi mol laga lena…